KHuda KHamosh bande bolte hain

ḳhudā ḳhāmosh bande bolte haiñ

baḌe chup hoñ to bachche bolte haiñ

suno sargoshiyāñ kuchh kah rahī haiñ

zabāñ-bandī meñ aise bolte haiñ

mohabbat kaise chhat par jaa.e chhup kar

qadam rakhte hī ziine bolte haiñ

nashe meñ jhūmne lagte haiñ ma.anī

to lafzoñ meñ karishme bolte haiñ

ye ham zindoñ se mumkin hī nahīñ hai

jo kuchh murdoñ se murde bolte haiñ

ham insānoñ ko aatā hai bas ik shor

tarannum meñ parinde bolte haiñ

ḳhamoshī suntī hai jab apnī āvāz

to sīnoñ meñ dafīne bolte haiñ

maiñ paiġhambar nahīñ huuñ phir bhī mujh meñ

ka.ī gum-sum sahīfe bolte haiñ

yahī hai vaqt bolo 'farhat-ehsās'

ki har jānib kamīne bolte haiñ

KHuda KHamosh bande bolte hain

baDe chup hon to bachche bolte hain

suno sargoshiyan kuchh kah rahi hain

zaban-bandi mein aise bolte hain

mohabbat kaise chhat par jae chhup kar

qadam rakhte hi zine bolte hain

nashe mein jhumne lagte hain mani

to lafzon mein karishme bolte hain

ye hum zindon se mumkin hi nahin hai

jo kuchh murdon se murde bolte hain

hum insanon ko aata hai bas ek shor

tarannum mein parinde bolte hain

KHamoshi sunti hai jab apni aawaz

to sinon mein dafine bolte hain

main paighambar nahin hun phir bhi mujh mein

kai gum-sum sahife bolte hain

yahi hai waqt bolo 'farhat-ehsas'

ki har jaanib kamine bolte hain