KHuda ki mar wo ayyam-e-shor-o-shar guzre

ḳhudā kī maar vo ayyām-e-shor-o-shar guzre

vo jin savār thā sar par ki sar se dar-guzre

halāl bhī mire haq meñ harām vāvailā

nigāh-e-shauq se kyā kyā gul-o-samar guzre

jo sabz-bāġh-e-tamannā pe pher de paanī

ḳhudā bachā.e ham aisī nazar se dar-guzre

nikāle aib meñ sau husn husn meñ sau aib

ḳhayāl hī to hai jaisā bañdhe jidhar guzre

zamīn paañv tale se nikal ga.ī to kyā

ham apnī dhun meñ zamāne se be-ḳhabar guzre

mazā na pochhiye vallāh dil dukhāne kā

kahāñ kā ḳhauf-e-ḳhudā Thaan lī to kar guzre

adab ke vāste kitnoñ ke dil dukhā.e haiñ

'yagānā' had se guzarnā na thā magar guzre

KHuda ki mar wo ayyam-e-shor-o-shar guzre

wo jin sawar tha sar par ki sar se dar-guzre

halal bhi mere haq mein haram wawaila

nigah-e-shauq se kya kya gul-o-samar guzre

jo sabz-bagh-e-tamanna pe pher de pani

KHuda bachae hum aisi nazar se dar-guzre

nikale aib mein sau husn husn mein sau aib

KHayal hi to hai jaisa bandhe jidhar guzre

zamin panw tale se nikal gai to kya

hum apni dhun mein zamane se be-KHabar guzre

maza na pochhiye wallah dil dukhane ka

kahan ka KHauf-e-KHuda Than li to kar guzre

adab ke waste kitnon ke dil dukhae hain

'yagana' had se guzarna na tha magar guzre