KHuda ko DhunD raha tha kahin KHuda na mila

ḳhudā ko DhūñD rahā thā kahīñ ḳhudā na milā

zahe-nasīb ki bande ko mudda.ā na milā

nigāh-e-shauq meñ be-nūriyoñ kā rañg baḌhā

nigāh-e-shauq ko jab koī dūsrā na milā

ham apnī be-ḳhudī-e-shauq par nisār rahe

ḳhudī ko DhūñDh liyā jab hameñ ḳhudā na milā

tumhārī bazm meñ lab khol kar huā ḳhāmosh

vo bad-nasīb jise koī aasrā na milā

har ek zarre meñ maiñ ḳhud to aa rahā thā nazar

ajiib baat tumhārā kahīñ pata na milā

bas ik sukūn hī ham ko na mil sakā tā-umr

vagarna tere tasadduq meñ ham ko kyā na milā

tirī nigāh-e-mohabbat-navāz hī kī qasam

ki aaj tak to hameñ tujh sā dūsrā na milā

tirā jamāl fazāoñ meñ muntashir thā magar

nigāh-e-shauq ko phir bhī tirā pata na milā

hazār Thokareñ khā.īñ hazār sū 'bahzād'

jahān-e-husn meñ koī bhī bā-vafā na milā

KHuda ko DhunD raha tha kahin KHuda na mila

zahe-nasib ki bande ko muddaa na mila

nigah-e-shauq mein be-nuriyon ka rang baDha

nigah-e-shauq ko jab koi dusra na mila

hum apni be-KHudi-e-shauq par nisar rahe

KHudi ko DhunDh liya jab hamein KHuda na mila

tumhaari bazm mein lab khol kar hua KHamosh

wo bad-nasib jise koi aasra na mila

har ek zarre mein main KHud to aa raha tha nazar

ajib baat tumhaara kahin pata na mila

bas ek sukun hi hum ko na mil saka ta-umr

wagarna tere tasadduq mein hum ko kya na mila

teri nigah-e-mohabbat-nawaz hi ki qasam

ki aaj tak to hamein tujh sa dusra na mila

tera jamal fazaon mein muntashir tha magar

nigah-e-shauq ko phir bhi tera pata na mila

hazar Thokaren khain hazar su 'bahzad'

jahan-e-husn mein koi bhi ba-wafa na mila