KHuda malum jab ghunche hanse shabnam pe kya guzri

ḳhudā ma.alūm jab ġhunche hañse shabnam pe kyā guzrī

tabassum kī fazā meñ dīda-e-pur-nam pe kyā guzrī

jalī shāḳh-e-nasheman tak nasheman kī rifāqat meñ

patā kyā bijliyoñ ko ham-safīro ham pe kyā guzrī

na paayā farq asīrī aur āzādī meñ jab koī

kahūñ kyā us ghaḌī apne Dil-e-pur-ġham pe kyā guzrī

azīz-e-misr kyā jaane ye pūchho pīr-e-kan.āñ se

ki furqat meñ pisar kī dīda-e-pur-nam pe kyā guzrī

use mahsūs kar saktā bhalā kyā zauq-e-iblīsī

ki jannat se nikalne meñ dil-e-ādam pe kyā guzrī

nasheman kī na chhoḌī ḳhaak bhī barq-e-havādis ne

ye manzar dekh kar ham kyā batā.eñ ham pe kyā guzrī

na suljhe tum ne suljhāne ko vaise laakh suljhāyā

mirī vahshat se dekho gesū-e-barham pe kyā guzrī

jo ho be-dard us ko dard kā ehsās kyūñkar ho

sitamgar kī balā jaane sitam se ham pe kyā guzrī

ġham-e-jānāñ hī kyā kam thā ġham-e-daurāñ bhī apnāyā

ḳhudā jaane asīr-e-gesu-e-pur-ḳham pe kyā guzrī

hamārī ek jur.at ne jo zauq-e-zindagī badlā

batā.eñ kyā dil-e-nā-āshnā-e-ġham pe kyā guzrī

sabab yārān-e-sāhil ai 'nazīr'-e-zār kyā jāneñ

ki tūfān-e-balā meñ Dūbtoñ ke dam pe kyā guzrī

KHuda malum jab ghunche hanse shabnam pe kya guzri

tabassum ki faza mein dida-e-pur-nam pe kya guzri

jali shaKH-e-nasheman tak nasheman ki rifaqat mein

pata kya bijliyon ko ham-safiro hum pe kya guzri

na paya farq asiri aur aazadi mein jab koi

kahun kya us ghaDi apne Dil-e-pur-gham pe kya guzri

aziz-e-misr kya jaane ye puchho pir-e-kanan se

ki furqat mein pisar ki dida-e-pur-nam pe kya guzri

use mahsus kar sakta bhala kya zauq-e-iblisi

ki jannat se nikalne mein dil-e-adam pe kya guzri

nasheman ki na chhoDi KHak bhi barq-e-hawadis ne

ye manzar dekh kar hum kya bataen hum pe kya guzri

na suljhe tum ne suljhane ko waise lakh suljhaya

meri wahshat se dekho gesu-e-barham pe kya guzri

jo ho be-dard us ko dard ka ehsas kyunkar ho

sitamgar ki bala jaane sitam se hum pe kya guzri

gham-e-jaanan hi kya kam tha gham-e-dauran bhi apnaya

KHuda jaane asir-e-gesu-e-pur-KHam pe kya guzri

hamari ek jurat ne jo zauq-e-zindagi badla

bataen kya dil-e-na-ashna-e-gham pe kya guzri

sabab yaran-e-sahil ai 'nazir'-e-zar kya jaanen

ki tufan-e-bala mein Dubton ke dam pe kya guzri