KHuda ne husn diya tujhko aur jamal diya

ḳhudā ne husn diyā tujh ko aur jamāl diyā

mujhe jo ishq diyā vo bhī be-misāl diyā

savāl vo ki na thā jis kā koī hal mumkin

mujhe bhī kyā karūñ us ne vahī savāl diyā

har ek haal meñ kartā huuñ rab kā shukr adā

kabhī ḳhushī mujhe baḳhshī kabhī malāl diyā

qur.ān-e-pāk se kuchh aisā mujh ko faiz milā

ke jis ne jahl mire qalb se nikāl diyā

mujhe ḳhatāoñ pe apnī jo sharm aa.ī hai

mire karīm ne merī sazā ko Taal diyā

sukūn-e-qalb mayassar thā mujh ko pahle magar

tumhārī chaah ne to uljhanoñ meñ Daal diyā

koī kamī nahīñ izzat meñ us bashar kī 'azīz'

jise ḳhudā ne kisī ilm meñ kamāl diyā

KHuda ne husn diya tujh ko aur jamal diya

mujhe jo ishq diya wo bhi be-misal diya

sawal wo ki na tha jis ka koi hal mumkin

mujhe bhi kya karun us ne wahi sawal diya

har ek haal mein karta hun rab ka shukr ada

kabhi KHushi mujhe baKHshi kabhi malal diya

quran-e-pak se kuchh aisa mujh ko faiz mila

ke jis ne jahl mere qalb se nikal diya

mujhe KHataon pe apni jo sharm aai hai

mere karim ne meri saza ko Tal diya

sukun-e-qalb mayassar tha mujh ko pahle magar

tumhaari chah ne to uljhanon mein Dal diya

koi kami nahin izzat mein us bashar ki 'aziz'

jise KHuda ne kisi ilm mein kamal diya