KHuda ne jis ko chaha usne bachche ki tarah zid ki

ḳhudā ne jis ko chāhā us ne bachche kī tarah zid kī

ḳhudā baḳhshish karegā is liye 'iqbāl-sājid' kī

gavāhī degā ik din ḳhud mirā munsif mire haq meñ

dharī rah jā.eñgī saarī dalīleñ mire hāsid kī

vahī jo pahle aayā thā vo sab ke baa'd bhī aayā

usī paikar ne to pahchān karvā.ī hai mūjid kī

jo mere dil meñ thī us ne vahī tahrīr pahuñchā.ī

ab us se baḌh ke kyā tā'rīf ho saktī hai qāsid kī

jo andar se nahīñ bāhar se ḳhadd-o-ḳhāl manvā.e

par asl-e-ā.ina sūrat gañvā detā hai qāsid kī

havāle se jo manvā.e vo sachchā.ī nahīñ hotī

qasam khātā nahīñ huuñ is liye maiñ rabb-e-vāhid kī

KHuda ne jis ko chaha us ne bachche ki tarah zid ki

KHuda baKHshish karega is liye 'iqbaal-sajid' ki

gawahi dega ek din KHud mera munsif mere haq mein

dhari rah jaengi sari dalilen mere hasid ki

wahi jo pahle aaya tha wo sab ke ba'd bhi aaya

usi paikar ne to pahchan karwai hai mujid ki

jo mere dil mein thi us ne wahi tahrir pahunchai

ab us se baDh ke kya ta'rif ho sakti hai qasid ki

jo andar se nahin bahar se KHadd-o-KHal manwae

par asl-e-aina surat ganwa deta hai qasid ki

hawale se jo manwae wo sachchai nahin hoti

qasam khata nahin hun is liye main rabb-e-wahid ki