KHuda-parast hue hum na but-parast hue

ḳhudā-parast hue ham na but-parast hue

kisī taraf na jhukā sar kuchh aise mast hue

jinheñ ġhurūr bahut thā namāz roze par

ga.e jo qabr meñ saare vuzū shikast hue

hamāre dil meñ jo vahshat ne aag bhaḌkā.ī

sharar bhī rah ga.e pīchhe ye garm jast hue

jo apne va.ade vafā vo kare karam us kā

ki ham se to na vafā vāda-e-alast hue

ġhurūr kar ke nigāhoñ se gir ga.e maġhrūr

buland jitne hue utne aur past hue

rahā ḳhumār ki sadme se chuur shīsha-e-dil

magar na sā.il-e-mai tere mai-parast hue

lagā.e ḳhaar lagīñ TaTTiyāñ bhī mehñdī kī

ruke na bu-e-chaman laakh band-o-bast hue

ḳhizāñ meñ bhī na chhuTā dāman-e-chaman ham se

hue jo suukh ke kāñTā to ḳhār-bast hue

banā hai panja-e-qassāb dast-e-zulm un kā

sab uñgliyāñ huiiñ chhuriyāñ ye tez dast hue

habāb se bhī habīboñ ke dil meñ nāzuk-tar

nazar ke bhī jo lage Thes ye shikast hue

taḌap dikhā na ise 'bahr' māhī-e-dil kī

ġhazab huā jo vo tār-e-nigāh shast hue

KHuda-parast hue hum na but-parast hue

kisi taraf na jhuka sar kuchh aise mast hue

jinhen ghurur bahut tha namaz roze par

gae jo qabr mein sare wuzu shikast hue

hamare dil mein jo wahshat ne aag bhaDkai

sharar bhi rah gae pichhe ye garm jast hue

jo apne wade wafa wo kare karam us ka

ki hum se to na wafa wada-e-alast hue

ghurur kar ke nigahon se gir gae maghrur

buland jitne hue utne aur past hue

raha KHumar ki sadme se chur shisha-e-dil

magar na sail-e-mai tere mai-parast hue

lagae KHar lagin TaTTiyan bhi mehndi ki

ruke na bu-e-chaman lakh band-o-bast hue

KHizan mein bhi na chhuTa daman-e-chaman hum se

hue jo sukh ke kanTa to KHar-bast hue

bana hai panja-e-qassab dast-e-zulm un ka

sab ungliyan huin chhuriyan ye tez dast hue

habab se bhi habibon ke dil mein nazuk-tar

nazar ke bhi jo lage Thes ye shikast hue

taDap dikha na ise 'bahr' mahi-e-dil ki

ghazab hua jo wo tar-e-nigah shast hue