KHuda rakkhe hamein tab se ki jab tumhaare bane

ḳhudā rakkhe hameñ tab se ki jab tumhāre bane

bahut bure the ham achchhe tumhāre maare bane

ye tere husn-e-nihāyat kā nām-e-nāmī hai

ki in se rang khuleñ aur isti'āre bane

tarah tarah se tire ḳhadd-o-ḳhāl dekhe haiñ

magar abhī bhī nahīñ tere māh-pāre bane

tire suḳhan se murattab huī luġhāt mirī

ye tere dast-e-hunar se mire ishāre bane

ye tere paañv uThe haiñ jahāñ-jahāñ ke liye

vahāñ vahāñ mire dariyāoñ ke kināre bane

junūn-e-asl meñ hangām-e-vasl milte hī

mire vujūd meñ sau sau tarah ke dhāre bane

ye tere shauq kī ḳhātir hai āsmān bichhā

ye tere shauq kī ḳhātir hai sab sitāre bane

KHuda rakkhe hamein tab se ki jab tumhaare bane

bahut bure the hum achchhe tumhaare mare bane

ye tere husn-e-nihayat ka nam-e-nami hai

ki in se rang khulen aur isti'are bane

tarah tarah se tere KHadd-o-KHal dekhe hain

magar abhi bhi nahin tere mah-pare bane

tere suKHan se murattab hui lughat meri

ye tere dast-e-hunar se mere ishaare bane

ye tere panw uThe hain jahan-jahan ke liye

wahan wahan mere dariyaon ke kinare bane

junun-e-asl mein hangam-e-wasl milte hi

mere wujud mein sau sau tarah ke dhaare bane

ye tere shauq ki KHatir hai aasman bichha

ye tere shauq ki KHatir hai sab sitare bane