خدا رکھے ہمیں تب سے کہ جب تمہارے بنے

خدا رکھے ہمیں تب سے کہ جب تمہارے بنے

بہت برے تھے ہم اچھے تمہارے مارے بنے

یہ تیرے حسن نہایت کا نام نامی ہے

کہ ان سے رنگ کھلیں اور استعارے بنے

طرح طرح سے ترے خد و خال دیکھے ہیں

مگر ابھی بھی نہیں تیرے ماہ پارے بنے

ترے سخن سے مرتب ہوئی لغات مری

یہ تیرے دست ہنر سے مرے اشارے بنے

یہ تیرے پاؤں اٹھے ہیں جہاں جہاں کے لئے

وہاں وہاں مرے دریاؤں کے کنارے بنے

جنون اصل میں ہنگام وصل ملتے ہی

مرے وجود میں سو سو طرح کے دھارے بنے

یہ تیرے شوق کی خاطر ہے آسمان بچھا

یہ تیرے شوق کی خاطر ہے سب ستارے بنے