KHuda rakkhe tujhe meri burai dekhne wale

ḳhudā rakkhe tujhe merī burā.ī dekhne vaale

vafādārī meñ tarz-e-bevafā.ī dekhne vaale

sambhal ab nāla-e-dil kī rasā.ī dekhne vaale

qayāmat Dhā.eñge roz-e-judā.ī dekhne vaale

tire ḳhanjar ko bhī terī tarah hasrat se takte haiñ

tirī nāzuk kamar nāzuk kalā.ī dekhne vaale

jhijak kar ā.īne meñ aks se apne vo kahte haiñ

yahāñ bhī aa ga.e sūrat parā.ī dekhne vaale

palak jhapkī ki dil ġhā.eb baġhal ḳhālī nazar aa.ī

tirī nazroñ kī dekheñge safā.ī dekhne vaale

inhīñ āñkhoñ se tū ne nek-o-bad aalam kā dekhā hai

idhar to dekh ai saarī ḳhudā.ī dekhne vaale

gire ġhash khā ke jab muusā kahā barq-e-tajallī ne

qayāmat tak na degā vo dikhā.ī dekhne vaale

mirī mayyat pe ban aa.ī hai un kī sab se kahte haiñ

vafādāroñ kī dekheñ bevafā.ī dekhne vaale

nazar miltī hai pīchhe pahle tantī haiñ bhañveñ un kī

kahāñ tak dekhe jaa.eñ kaj-adā.ī dekhne vaale

miTā inkār to hujjat ye niklī muñh dikhāne meñ

ki pahle jam.a kar deñ rū-numā.ī dekhne vaale

kahāñ tak ro.eñ qismat ke likhe ko bas ulaT parda

tujhe dekheñge ab terī ḳhudā.ī dekhne vaale

kabhī qadmoñ meñ thā ab un ke dil meñ hai jagah merī

mujhe dekheñ muqaddar kī rasā.ī dekhne vaale

koī itnā nahīñ jo aa ke pūchhe hijr meñ 'beḳhud'

tirā kyā haal hai ranj-e-judā.ī dekhne vaale

KHuda rakkhe tujhe meri burai dekhne wale

wafadari mein tarz-e-bewafai dekhne wale

sambhal ab nala-e-dil ki rasai dekhne wale

qayamat Dhaenge roz-e-judai dekhne wale

tere KHanjar ko bhi teri tarah hasrat se takte hain

teri nazuk kamar nazuk kalai dekhne wale

jhijak kar aaine mein aks se apne wo kahte hain

yahan bhi aa gae surat parai dekhne wale

palak jhapki ki dil ghaeb baghal KHali nazar aai

teri nazron ki dekhenge safai dekhne wale

inhin aankhon se tu ne nek-o-bad aalam ka dekha hai

idhar to dekh ai sari KHudai dekhne wale

gire ghash kha ke jab musa kaha barq-e-tajalli ne

qayamat tak na dega wo dikhai dekhne wale

meri mayyat pe ban aai hai un ki sab se kahte hain

wafadaron ki dekhen bewafai dekhne wale

nazar milti hai pichhe pahle tanti hain bhanwen un ki

kahan tak dekhe jaen kaj-adai dekhne wale

miTa inkar to hujjat ye nikli munh dikhane mein

ki pahle jama kar den ru-numai dekhne wale

kahan tak roen qismat ke likhe ko bas ulaT parda

tujhe dekhenge ab teri KHudai dekhne wale

kabhi qadmon mein tha ab un ke dil mein hai jagah meri

mujhe dekhen muqaddar ki rasai dekhne wale

koi itna nahin jo aa ke puchhe hijr mein 'beKHud'

tera kya haal hai ranj-e-judai dekhne wale