KHuda se roz-e-azal kis ne iKHtilaf kiya

ḳhudā se roz-e-azal kis ne iḳhtilāf kiyā

vo aadmī to na thā jis ne inhirāf kiyā

maiñ kyā batā.ūñ ki qalb-o-nazar pe kyā guzrī

kiran ne qatra-e-shabnam meñ jab shigāf kiyā

vahī to huuñ maiñ ki jis ke vajūd se pahle

ḳhud apne rab se farishtoñ ne iḳhtilāf kiyā

usī ke rahm-o-karam par hai āqibat merī

na jis ne pahlī ḳhatā ko mirī muaaf kiyā

azal se ālam-e-maujūd tak safar kar ke

ḳhud apne jism ke hujre meñ etakāf kiyā

ḳhudā-gavāh ki maiñ ne ḳhud-āgahī ke liye

samajh ke ḳhud ko haram umr bhar tavāf kiyā

raheñge qasr-e-aqā.ed na falsafoñ ke mahal

jo maiñ ne apnī haqīqat kā inkishāf kiyā

KHuda se roz-e-azal kis ne iKHtilaf kiya

wo aadmi to na tha jis ne inhiraf kiya

main kya bataun ki qalb-o-nazar pe kya guzri

kiran ne qatra-e-shabnam mein jab shigaf kiya

wahi to hun main ki jis ke wajud se pahle

KHud apne rab se farishton ne iKHtilaf kiya

usi ke rahm-o-karam par hai aaqibat meri

na jis ne pahli KHata ko meri muaf kiya

azal se aalam-e-maujud tak safar kar ke

KHud apne jism ke hujre mein etakaf kiya

KHuda-gawah ki main ne KHud-agahi ke liye

samajh ke KHud ko haram umr bhar tawaf kiya

rahenge qasr-e-aqaed na falsafon ke mahal

jo main ne apni haqiqat ka inkishaf kiya