KHuda se waqt-e-dua hum sawal kar baiThe

ḳhudā se vaqt-e-duā ham savāl kar baiThe

vo but bhī dil ko zarā ab sambhāl kar baiThe

kiyā hai aañkh kī gardish se piis kar surma

vo be-chale hī mujhe pā.emāl kar baiThe

tamām umr pareshāñ rakhā dam-e-āḳhir

balā se merī pareshāñ vo baal kar baiThe

chale haiñ tuur ko muusā magar hameñ matlab

ki ham butoñ hī meñ ye dekh-bhāl kar baiThe

ravāñ haiñ ashk kisī ke firāq meñ yā rab

koī na pursish-e-vaj.h-e-malāl kar baiThe

burā ho ulfat-e-ḳhūbāñ kā ham-nashīñ ham to

shabāb hī meñ burā apnā haal kar baiThe

na ilm hai na zabāñ hai to kis liye 'mahrūm'

tum apne aap ko shā.ir ḳhayāl kar baiThe

KHuda se waqt-e-dua hum sawal kar baiThe

wo but bhi dil ko zara ab sambhaal kar baiThe

kiya hai aankh ki gardish se pis kar surma

wo be-chale hi mujhe paemal kar baiThe

tamam umr pareshan rakha dam-e-aKHir

bala se meri pareshan wo baal kar baiThe

chale hain tur ko musa magar hamein matlab

ki hum buton hi mein ye dekh-bhaal kar baiThe

rawan hain ashk kisi ke firaq mein ya rab

koi na pursish-e-wajh-e-malal kar baiThe

bura ho ulfat-e-KHuban ka ham-nashin hum to

shabab hi mein bura apna haal kar baiThe

na ilm hai na zaban hai to kis liye 'mahrum'

tum apne aap ko shair KHayal kar baiThe