KHuda use bhi kisi din zawal deta hai

ḳhudā use bhī kisī din zavāl detā hai

zamāna jis ke hunar kī misāl detā hai

vo jab shu'ūr ko lafzoñ meñ Dhaal detā hai

'ajīb soch nirāle ḳhayāl detā hai

koī samajh na sakā us kī den kā andāza

kabhī ḳhushī kabhī ranj-o-malāl detā hai

kabhī vo zaḳhm lagātā hai mere siine par

kabhī vo paañv se kāñTā nikāl detā hai

usī ne dī hai gunāh-o-savāb kī tafrīq

vahī shu.ūr-e-harām-o-halāl detā hai

mire ḳhudā use sanjīdgī 'atā kar de

vo merī baat ko hañs hañs ke Taal detā hai

kabhī kināre bhī kashtī bachā nahīñ sakte

kabhī bhañvar bhī safīne uchhāl detā hai

vo kar guzartā hai aksar mirā junūñ 'ejāz'

ki jo ḳhirad ko bhī hairat meñ Daal detā hai

KHuda use bhi kisi din zawal deta hai

zamana jis ke hunar ki misal deta hai

wo jab shu'ur ko lafzon mein Dhaal deta hai

'ajib soch nirale KHayal deta hai

koi samajh na saka us ki den ka andaza

kabhi KHushi kabhi ranj-o-malal deta hai

kabhi wo zaKHm lagata hai mere sine par

kabhi wo panw se kanTa nikal deta hai

usi ne di hai gunah-o-sawab ki tafriq

wahi shuur-e-haram-o-halal deta hai

mere KHuda use sanjidgi 'ata kar de

wo meri baat ko hans hans ke Tal deta hai

kabhi kinare bhi kashti bacha nahin sakte

kabhi bhanwar bhi safine uchhaal deta hai

wo kar guzarta hai aksar mera junun 'ejaz'

ki jo KHirad ko bhi hairat mein Dal deta hai