KHudai mujhko mil jati KHuda-e-do-jahan milta

ḳhudā.ī mujh ko mil jaatī ḳhudā-e-do-jahāñ miltā

jo tum milte to goyā hāsil-e-kaun-o-makāñ miltā

ġhulām-e-sāqī-e-kausar huuñ mai kī kyā kamī mujh ko

na miltā gar yahāñ sāġhar mirā hissa vahāñ miltā

ise kab koī pā saktā use kyā dekhtā koī

nazar se duur dil kī vus.atoñ meñ jo nihāñ miltā

unheñ kab niiñd aa.ī sunte sunte dil kā afsāna

yahī thā vaqt jab un ko bhī lutf-e-dāstāñ miltā

jalātī ek bijlī kyūñ-kar itne āshiyānoñ ko

chaman ke patte patte par hamārā āshiyāñ miltā

hamāre sajda-e-be-āstāñ kā ye karishma thā

na hotā āstāñ jis jā vahāñ bhī āstāñ miltā

vahāñ do chaar sajde tum bhī kar lo jā ke ai 'afqar'

pa.e sajda zamīñ se jis jagah hai āsmāñ miltā

KHudai mujh ko mil jati KHuda-e-do-jahan milta

jo tum milte to goya hasil-e-kaun-o-makan milta

ghulam-e-saqi-e-kausar hun mai ki kya kami mujh ko

na milta gar yahan saghar mera hissa wahan milta

ise kab koi pa sakta use kya dekhta koi

nazar se dur dil ki wusaton mein jo nihan milta

unhen kab nind aai sunte sunte dil ka afsana

yahi tha waqt jab un ko bhi lutf-e-dastan milta

jalati ek bijli kyun-kar itne aashiyanon ko

chaman ke patte patte par hamara aashiyan milta

hamare sajda-e-be-astan ka ye karishma tha

na hota aastan jis ja wahan bhi aastan milta

wahan do chaar sajde tum bhi kar lo ja ke ai 'afqar'

pae sajda zamin se jis jagah hai aasman milta