KHudara rahzanon dil ke mere arman mat chhino

ḳhudārā rahzanoñ dil ke mire armān mat chhīno

banā doge ise tum ḳhāna-e-vīrān mat chhīno

ujāḌo mat mirā gulshan mujhe nāshād rahne do

mire aañsū mirī rāhat ke ye sāmān mat chhīno

tabassum chhīn lo hoñToñ kā ḳhushiyāñ ziist kī lekin

mire afsāna-hā-e-shauq ke unvān mat chhīno

ḳhamoshī dāstān-e-ġham mirī kah jā.egī ik din

mire kuchh giit rahne do mirī har taan mat chhīno

tapish se zindagī ke reg-zāroñ kī na mar jā.ūñ

sajā rakhe haiñ kuchh ḳhush-rañg ḳhvābistān mat chhīno

na.ī duniyā na.e insāñ na.ī bāteñ mubārak hoñ

mirī giitā ko rahne do mirā qur.ān mat chhīno

KHudara rahzanon dil ke mere arman mat chhino

bana doge ise tum KHana-e-viran mat chhino

ujaDo mat mera gulshan mujhe nashad rahne do

mere aansu meri rahat ke ye saman mat chhino

tabassum chhin lo honTon ka KHushiyan zist ki lekin

mere afsana-ha-e-shauq ke unwan mat chhino

KHamoshi dastan-e-gham meri kah jaegi ek din

mere kuchh git rahne do meri har tan mat chhino

tapish se zindagi ke reg-zaron ki na mar jaun

saja rakhe hain kuchh KHush-rang KHwabistan mat chhino

nai duniya nae insan nai baaten mubarak hon

meri gita ko rahne do mera quran mat chhino