KHudaya aap faqat bandagi ke qabil hain

ḳhudāyā aap faqat bandagī ke qābil haiñ

ye saare log to bas 'ājizī ke qābil haiñ

vo log jis ne kisī kā burā nahīñ sochā

vo kis tarah se bhalā dushmanī ke qābil haiñ

zabāñ-darāz haiñ man-māniyāñ jo kartī haiñ

so aisī laḌkiyāñ kab ruḳhsatī ke qābil haiñ

vo jis ne 'ishq-o-mohabbat kā farq samjhā nahīñ

to aise log faqat dil-lagī ke qābil haiñ

jo apne chehroñ pe dohrā naqāb rakhte haiñ

to aise doġhle phir be-ruḳhī ke qābil haiñ

jo tīrgī meñ hī ḳhush rah rahe haiñ barsoñ se

phir aise log kahāñ raushnī ke qābil haiñ

ye log qadr nahīñ jānte haiñ bārish kī

ye tishna-lab hī sahī tishnagī ke qābil haiñ

vo ġham jo tum se mile vo likhe haiñ 'sārim' ne

ham ahl-e-dard kahāñ shā'irī ke qābil haiñ

KHudaya aap faqat bandagi ke qabil hain

ye sare log to bas 'ajizi ke qabil hain

wo log jis ne kisi ka bura nahin socha

wo kis tarah se bhala dushmani ke qabil hain

zaban-daraaz hain man-maniyan jo karti hain

so aisi laDkiyan kab ruKHsati ke qabil hain

wo jis ne 'ishq-o-mohabbat ka farq samjha nahin

to aise log faqat dil-lagi ke qabil hain

jo apne chehron pe dohra naqab rakhte hain

to aise doghle phir be-ruKHi ke qabil hain

jo tirgi mein hi KHush rah rahe hain barson se

phir aise log kahan raushni ke qabil hain

ye log qadr nahin jaante hain barish ki

ye tishna-lab hi sahi tishnagi ke qabil hain

wo gham jo tum se mile wo likhe hain 'sarim' ne

hum ahl-e-dard kahan sha'iri ke qabil hain