KHudaya kash tujhi ko gawah kar lete

ḳhudāyā kaash tujhī ko gavāh kar lete

nigāh-e-ḳhalq se bach kar gunāh kar lete

hayāt ḳhud hī mire dar kī pāsbāñ hotī

urūs-e-marg se ik din jo chaah kar lete

falak na rahtā na rū-e-zamīñ kī rañgīnī

tumhāre jaur-o-sitam par jo aah kar lete

na karte jabr kisī par bhī log phir shāyad

jo iḳhtiyār pe apne nigāh kar lete

gadāgarī ke to ilzām se bache rahte

ham apne sar pe agar kaj-kulāh kar lete

hamārī fikr kā thoḌā sā to sila miltā

jo ahl-e-bazm hī kuchh vaah vaah kar lete

nibāh lete zamāne se ham bhī mar-khap kar

jo aap 'asar' ke dil meñ na raah kar lete

KHudaya kash tujhi ko gawah kar lete

nigah-e-KHalq se bach kar gunah kar lete

hayat KHud hi mere dar ki pasban hoti

urus-e-marg se ek din jo chah kar lete

falak na rahta na ru-e-zamin ki rangini

tumhaare jaur-o-sitam par jo aah kar lete

na karte jabr kisi par bhi log phir shayad

jo iKHtiyar pe apne nigah kar lete

gadagari ke to ilzam se bache rahte

hum apne sar pe agar kaj-kulah kar lete

hamari fikr ka thoDa sa to sila milta

jo ahl-e-bazm hi kuchh wah wah kar lete

nibah lete zamane se hum bhi mar-khap kar

jo aap 'asar' ke dil mein na rah kar lete