KHudi ke bagh ke phulon ki tazgi hun main

ḳhudī ke baaġh ke phūloñ kī tāzgī huuñ maiñ

bahār-e-husn-e-tamaddun kī dilkashī huuñ maiñ

zamīr-e-zarf huuñ tahzīb-e-ājizī huuñ maiñ

mizāj-e-sabr-o-tahammul kī sādgī huuñ maiñ

na chāñd huuñ na sitāra na chāñdnī huuñ maiñ

charāġh-e-azmat-e-ġhairat kī raushnī huuñ maiñ

sulagtī dhuup kī ḳhātir huuñ chhāñv rāhat kī

adab kī ḳhushk zamīñ ke liye namī huuñ maiñ

ḳhulūs vaale ko pahchāntā nahīñ koī

na.ī sadī kī nigāhoñ meñ ajnabī huuñ maiñ

kisī amiir kā ehsāñ liyā na maiñ ne kabhī

ḳhudī ko naaz hai jis par vo aadmī huuñ maiñ

amīr-e-shahr se merā koī lagāv nahīñ

ġharīb-e-shahr se nisbat hai muflisī huuñ maiñ

vafā ke gahre samundar se merā rishta hai

'qamar' ḳhulūs kī bahtī huī nadī huuñ maiñ

KHudi ke bagh ke phulon ki tazgi hun main

bahaar-e-husn-e-tamaddun ki dilkashi hun main

zamir-e-zarf hun tahzib-e-ajizi hun main

mizaj-e-sabr-o-tahammul ki sadgi hun main

na chand hun na sitara na chandni hun main

charagh-e-azmat-e-ghairat ki raushni hun main

sulagti dhup ki KHatir hun chhanw rahat ki

adab ki KHushk zamin ke liye nami hun main

KHulus wale ko pahchanta nahin koi

nai sadi ki nigahon mein ajnabi hun main

kisi amir ka ehsan liya na main ne kabhi

KHudi ko naz hai jis par wo aadmi hun main

amir-e-shahr se mera koi lagaw nahin

gharib-e-shahr se nisbat hai muflisi hun main

wafa ke gahre samundar se mera rishta hai

'qamar' KHulus ki bahti hui nadi hun main