KHudi ke zoam mein aisa wo mubtala hua hai

ḳhudī ke zo.am meñ aisā vo mubtalā huā hai

jo aadmī bhī nahīñ thā vo ab ḳhudā huā hai

vo kah rahā thā bujhā.egā pyaas sahrā kī

mirā ik abr ke TukḌe se rābta huā hai

tumhārā tarz-e-bayāñ ḳhuub hai magar sāhab

ye qissa maiñ ne zarā muḳhtalif sunā huā hai

ye miTTī paañv mire chhoḌtī nahīñ varna

falak kā rāsta bhī sāmne paḌā huā hai

usī ke haath pe bai.at maiñ kar ke aayā huuñ

jo būḌhā peḌ kaḌī dhuup meñ khaḌā huā hai

ḳhirāj māñgtā hai mujh se ye badan merā

ki lauh-e-dil pe tirā naam bhī likhā huā hai

vo mujh ko dekh ke rasta badal gayā 'arshad'

zarā sī der meñ us ko ye jaane kyā huā hai

KHudi ke zoam mein aisa wo mubtala hua hai

jo aadmi bhi nahin tha wo ab KHuda hua hai

wo kah raha tha bujhaega pyas sahra ki

mera ek abr ke TukDe se rabta hua hai

tumhaara tarz-e-bayan KHub hai magar sahab

ye qissa main ne zara muKHtalif suna hua hai

ye miTTi panw mere chhoDti nahin warna

falak ka rasta bhi samne paDa hua hai

usi ke hath pe baiat main kar ke aaya hun

jo buDha peD kaDi dhup mein khaDa hua hai

KHiraj mangta hai mujh se ye badan mera

ki lauh-e-dil pe tera nam bhi likha hua hai

wo mujh ko dekh ke rasta badal gaya 'arshad'

zara si der mein us ko ye jaane kya hua hai