کھل گیا دیدۂ تر سے غم پنہاں میرا

کھل گیا دیدۂ تر سے غم پنہاں میرا

اب تو رنگیں نظر آتا ہے گریباں میرا

ذرہ ذرہ مری نظروں میں ہے آئینۂ حسن

کیا دکھاتا ہے مجھے دیدۂ حیراں میرا

بڑھ چلی وحشت دل رحم کر اے جوش بہار

کہ مرے ہاتھ سے جاتا ہے گریباں میرا

طالب داد جفا اور وفا ہو کس سے

حسن محجوب ترا عشق پشیماں میرا

ختم ہے تا بہ سحر زندگی شمع حیات

اب نہ منہ دیکھے گی تو اے شب ہجراں میرا

گوشہ گوشہ میں ہے اک حشر سلاسل برپا

آج فریاد سے معمور ہے زنداں میرا

میں وہ خوں کردۂ آزار تپش ہوں ثاقبؔ

دے سکی ساتھ نہ طول شب ہجراں میرا