کھل کر نہ سر عام ہو اظہار بھلے ہی

کھل کر نہ سر عام ہو اظہار بھلے ہی

ہے بغض کریں ہم سے وہ انکار بھلے ہی

بچوں نے تو آپس میں نہیں کھیلنا چھوڑا

آنگن میں اٹھائی گئی دیوار بھلے ہی

پھیلایا نہ ہاتھوں کو کبھی آگے کسی کے

ہر وقت مسائل سے ہوں دو چار بھلے ہی

مسجد کی شہادت میں رہی یہ بھی ملوث

کرتی رہے انکار یہ سرکار بھلے ہی

دولت ہی جھکا پائی نہ قانون ہی اس کو

فاقوں سے مرا ہے وہ قلم کار بھلے ہی

ہے سچا پرستار وہ اردو کا اے ساحلؔ

ہے ایک رسالے کا خریدار بھلے ہی