کھل کے واضح بھی نہ ہونے پائی تھیں پرچھائیاں

کھل کے واضح بھی نہ ہونے پائی تھیں پرچھائیاں

مجھ کو زخمی کر گئیں کچھ آنسوؤں کی کرچیاں

جب سے اس کی گفتگو مفہوم سے عاری ہوئی

اس کی نظمیں پا رہی ہیں داد میں ہمدردیاں

میری نظروں میں بہت مشکوک ہے اس کا وجود

راہ جس کی دیکھتی ہیں شہر بھر کی لڑکیاں

مجھ کو اس کے ٹوٹتے لہجے میں دو چیزیں ملیں

چند لمحوں کا سکوں اور عمر کی تنہائیاں

اس کو باہر کی فضا میں روشنی کیسے ملے

جس کو اس کے گھر کا سورج دے گیا تاریکیاں

کس کو ان صفحات میں پیکر نظر آئے مرا

کون ڈھونڈے زندگی کی ڈائری میں تلخیاں

آج بھی مانوس سی ان خوشبوؤں کی یاد میں

میری پلکوں پر اتر آتی ہیں کچھ حیرانیاں

صبح کی کرنیں اڑیں سب کے دریچے وا ہوئے

دور وادی میں کہیں بجنے لگیں شہنائیاں

سب کو سطح آب پر کھلتے کنول اچھے لگیں

کس نے دیکھی ہیں حمیراؔ جھیل کی گہرائیاں