khul ke wazeh bhi na hone pai thin parchhaiyan

khul ke vāzeh bhī na hone paa.ī thiiñ parchhā.iyāñ

mujh ko zaḳhmī kar ga.iiñ kuchh āñsuoñ kī kirchiyāñ

jab se us kī guftugū mafhūm se 'aarī huī

us kī nazmeñ pā rahī haiñ daad meñ hamdardiyāñ

merī nazroñ meñ bahut mashkūk hai us kā vujūd

raah jis kī dekhtī haiñ shahr-bhar kī laḌkiyāñ

mujh ko us ke TūTte lahje meñ do chīzeñ milīñ

chand lamhoñ kā sukūñ aur 'umr kī tanhā.iyāñ

us ko bāhar kī fazā meñ raushnī kaise mile

jis ko us ke ghar kā sūraj de gayā tārīkiyāñ

kis ko in safhāt meñ paikar nazar aa.e mirā

kaun DhūñDe zindagī kī Diary meñ talḳhiyāñ

aaj bhī mānūs sī un ḳhushbuoñ kī yaad meñ

merī palkoñ par utar aatī haiñ kuchh hairāniyāñ

sub.h kī kirneñ uḌiiñ sab ke darīche vā hue

duur vaadī meñ kahīñ bajne lagīñ shahnā.iyāñ

sab ko sat.h-e-āb par khilte kañval achchhe lageñ

kis ne dekhī haiñ 'humairā' jhiil kī gahrā.iyāñ

khul ke wazeh bhi na hone pai thin parchhaiyan

mujh ko zaKHmi kar gain kuchh aansuon ki kirchiyan

jab se us ki guftugu mafhum se 'ari hui

us ki nazmen pa rahi hain dad mein hamdardiyan

meri nazron mein bahut mashkuk hai us ka wujud

rah jis ki dekhti hain shahr-bhar ki laDkiyan

mujh ko us ke TuTte lahje mein do chizen milin

chand lamhon ka sukun aur 'umr ki tanhaiyan

us ko bahar ki faza mein raushni kaise mile

jis ko us ke ghar ka suraj de gaya tarikiyan

kis ko in safhat mein paikar nazar aae mera

kaun DhunDe zindagi ki Diary mein talKHiyan

aaj bhi manus si un KHushbuon ki yaad mein

meri palkon par utar aati hain kuchh hairaniyan

subh ki kirnen uDin sab ke dariche wa hue

dur wadi mein kahin bajne lagin shahnaiyan

sab ko sath-e-ab par khilte kanwal achchhe lagen

kis ne dekhi hain 'humaira' jhil ki gahraiyan