khula dimagh to phir dil ko saf karna paDa

khulā dimāġh to phir dil ko saaf karnā paḌā

mirī vafā kā use e'tirāf karnā paḌā

vo apne chehre pe rakhtā thā dūsrā chehra

fareb khā ke mujhe inkishāf karnā paḌā

thiiñ aisī kaun sī majbūriyāñ tumhāre liye

ki ahl-e-dil se tumheñ iḳhtilāf karnā paḌā

chahār samt gunāhoñ ke haath phaile the

isī liye to mujhe etakāf karnā paḌā

diyā jab apnī adāoñ kā vāsta us ne

to bevafā ko mujhe ḳhud muaaf karnā paḌā

ḳhudā hī jaane ki dekhā to kyā huā ehsās

ki rū-e-gul kā nazar se tavāf karnā paḌā

rahā na zabt kā yaarā to ek din āḳhir

'alīm' apne hī dil meñ shigāf karnā paḌā

khula dimagh to phir dil ko saf karna paDa

meri wafa ka use e'tiraf karna paDa

wo apne chehre pe rakhta tha dusra chehra

fareb kha ke mujhe inkishaf karna paDa

thin aisi kaun si majburiyan tumhaare liye

ki ahl-e-dil se tumhein iKHtilaf karna paDa

chahaar samt gunahon ke hath phaile the

isi liye to mujhe etakaf karna paDa

diya jab apni adaon ka wasta us ne

to bewafa ko mujhe KHud muaf karna paDa

KHuda hi jaane ki dekha to kya hua ehsas

ki ru-e-gul ka nazar se tawaf karna paDa

raha na zabt ka yara to ek din aaKHir

'alim' apne hi dil mein shigaf karna paDa