khule hain mashriq-o-maghrib ki god mein gulzar

khule haiñ mashriq-o-maġhrib kī god meñ gulzār

magar ḳhizāñ ko mayassar nahīñ yaqīn-e-bahār

ḳhabar nahīñ hai bamoñ ke banāne vāloñ ko

tamīz ho to mah-o-mehr-o-kahkashāñ haiñ shikār

usī se teġh-e-nigah āb-dār hotī hai

tujhe batā.ūñ baḌī shai hai jur.at-e-inkār

kiye haiñ shauq ne paidā hazār vīrāne

ik aarzū ne basā.e haiñ laakh shahr-e-dayār

nashāt-e-sub.h-e-bahārāñ tujhe nasīb nahīñ

tire nigah meñ hai biitī huī shaboñ kā ḳhumār

faroḳht hotī hai insāniyat sī jins-e-girāñ

jahāñ ko phūñk na degī ye garmī-e-bāzār

yahī hai zīnat-o-ārā.ish urūs-e-suḳhan

magar fareb bhī detī hai shoḳhī-e-guftār

khule hain mashriq-o-maghrib ki god mein gulzar

magar KHizan ko mayassar nahin yaqin-e-bahaar

KHabar nahin hai bamon ke banane walon ko

tamiz ho to mah-o-mehr-o-kahkashan hain shikar

usi se tegh-e-nigah aab-dar hoti hai

tujhe bataun baDi shai hai jurat-e-inkar

kiye hain shauq ne paida hazar virane

ek aarzu ne basae hain lakh shahr-e-dayar

nashat-e-subh-e-bahaaran tujhe nasib nahin

tere nigah mein hai biti hui shabon ka KHumar

faroKHt hoti hai insaniyat si jins-e-giran

jahan ko phunk na degi ye garmi-e-bazar

yahi hai zinat-o-araish urus-e-suKHan

magar fareb bhi deti hai shoKHi-e-guftar