khuli aankhon se sapna dekhne mein

khulī āñkhoñ se sapnā dekhne meñ

gañvā dī umr rasta dekhne meñ

bahā kar le ga.ī ik mauj-e-dariyā

bahut the mahv dariyā dekhne meñ

havā kūcha-ba-kūcha ro rahī hai

sajā hai qarya qarya dekhne meñ

jo barteñ to khuleñ sab bhed us ke

hasīñ lagtī hai duniyā dekhne meñ

darīchoñ se ye dil-āvez manzar

bure lagte haiñ tanhā dekhne meñ

nikal aatā hai kaḌvā zā.iqe meñ

jo phal hotā hai mīThā dekhne meñ

haqīqat meñ vo aisā to nahīñ hai

nazar aatā hai jaisā dekhne meñ

azāb-e-gumrahī meñ mubtalā haiñ

bhaTak jaate haiñ rasta dekhne meñ

qazā aksar namāzeñ ho ga.ī haiñ

nishān-e-samt-e-qibla dekhne meñ

ham ehrām-e-havas pahne hue haiñ

labāda hai ye ujlā dekhne meñ

vahīñ aksar shanāvar Dūbte haiñ

jo haiñ pāyāb dariyā dekhne meñ

yahī hai laġhzish-e-bīnā.ī 'mohsin'

ki ho mashġhūl duniyā dekhne meñ

khuli aankhon se sapna dekhne mein

ganwa di umr rasta dekhne mein

baha kar le gai ek mauj-e-dariya

bahut the mahw dariya dekhne mein

hawa kucha-ba-kucha ro rahi hai

saja hai qarya qarya dekhne mein

jo barten to khulen sab bhed us ke

hasin lagti hai duniya dekhne mein

darichon se ye dil-awez manzar

bure lagte hain tanha dekhne mein

nikal aata hai kaDwa zaiqe mein

jo phal hota hai miTha dekhne mein

haqiqat mein wo aisa to nahin hai

nazar aata hai jaisa dekhne mein

azab-e-gumrahi mein mubtala hain

bhaTak jate hain rasta dekhne mein

qaza aksar namazen ho gai hain

nishan-e-samt-e-qibla dekhne mein

hum ehram-e-hawas pahne hue hain

labaada hai ye ujla dekhne mein

wahin aksar shanawar Dubte hain

jo hain payab dariya dekhne mein

yahi hai laghzish-e-binai 'mohsin'

ki ho mashghul duniya dekhne mein