khuli faza mein parindon pe war mat karna

khulī fazā meñ parindoñ pe vaar mat karnā

ye zālimāna ravish iḳhtiyār mat karnā

nigāh-e-ahl-e-mohabbat meñ dil hai ā.īna

is aa.ine ko kabhī dāġh-dār mat karnā

hamesha ḳhuun ke aañsū rulā.egā tum ko

jo ḳhud-ġharaz ho bahut us se pyaar mat karnā

kisī bhī shaḳhs pe kar lenā tum yaqīñ lekin

musāfiroñ kā kabhī e.atibār mat karnā

husūl-e-zar kī tamanna meñ itnā yaad rahe

kisī kā dāman-e-jāñ taar taar mat karnā

phisal ga.e haiñ jo lamhe tumhāre hāthoñ se

palaT ke ā.eñge ye intizār mat karnā

tumhāre pyaar pe jis ko bahut bharosa ho

use ḳhudā ke liye ashk-bār mat karnā

tumhāre vāste jo bā.is-e-nadāmat ho

koī bhī aisā amal iḳhtiyār mat karnā

ye aur baat ki 'asrār' jald aa na sake

tum apne dil ko bahut be-qarār mat karnā

khuli faza mein parindon pe war mat karna

ye zalimana rawish iKHtiyar mat karna

nigah-e-ahl-e-mohabbat mein dil hai aaina

is aaine ko kabhi dagh-dar mat karna

hamesha KHun ke aansu rulaega tum ko

jo KHud-gharaz ho bahut us se pyar mat karna

kisi bhi shaKHs pe kar lena tum yaqin lekin

musafiron ka kabhi eatibar mat karna

husul-e-zar ki tamanna mein itna yaad rahe

kisi ka daman-e-jaan tar tar mat karna

phisal gae hain jo lamhe tumhaare hathon se

palaT ke aaenge ye intizar mat karna

tumhaare pyar pe jis ko bahut bharosa ho

use KHuda ke liye ashk-bar mat karna

tumhaare waste jo bais-e-nadamat ho

koi bhi aisa amal iKHtiyar mat karna

ye aur baat ki 'asrar' jald aa na sake

tum apne dil ko bahut be-qarar mat karna