khuli jab aankh to dekha ki tha bazar ka halqa

khulī jab aañkh to dekhā ki thā bāzār kā halqa

ḳhudā mā'lūm kab TuuTā mire pindār kā halqa

tulū-e-shām bhī mujh ko naved-e-sub.h-e-fardā hai

kahīñ chamke hilāl-e-abrū-e-ḳham-dār kā halqa

mirā ḳhūn-e-tamannā hai hinā-band-e-kaf-e-qātil

junūn-e-shauq kaam aayā farāz-e-dār kā halqa

dil-e-but-āshnā kuchh is tarah sū-e-haram aayā

barhaman jaise nikle toḌ kar zunnār kā halqa

talab kī raah meñ pā-e-anā se bārhā uljhā

kabhī inkār kā halqa kabhī iqrār kā halqa

ye kū-e-ġham badal jaa.e na ab dasht-e-tamannā se

junūñ-angez hai zindāñ kī har dīvār kā halqa

har ik mahfil meñ jaanā har kisī se baat kar lenā

gavārā kar nahīñ saktā mire me'yār kā halqa

lahū qadmoñ se yuuñ phūTā ki zanjīreñ lahak uTThīñ

munavvar ho gayā zindān-e-tañg-o-tār kā halqa

ġham-e-imroz ne paimāñ kiyā hai ishq-e-fardā se

kabhī to hogā shāna-gīr zulf-e-yār kā halqa

koī āsāñ na thā lekin bahut mushkil na thā 'tarzī'

mirī zarb-e-nafas se khul gayā asrār kā halqa

khuli jab aankh to dekha ki tha bazar ka halqa

KHuda ma'lum kab TuTa mere pindar ka halqa

tulu-e-sham bhi mujh ko nawed-e-subh-e-farda hai

kahin chamke hilal-e-abru-e-KHam-dar ka halqa

mera KHun-e-tamanna hai hina-band-e-kaf-e-qatil

junun-e-shauq kaam aaya faraaz-e-dar ka halqa

dil-e-but-ashna kuchh is tarah su-e-haram aaya

barhaman jaise nikle toD kar zunnar ka halqa

talab ki rah mein pa-e-ana se barha uljha

kabhi inkar ka halqa kabhi iqrar ka halqa

ye ku-e-gham badal jae na ab dasht-e-tamanna se

junun-angez hai zindan ki har diwar ka halqa

har ek mahfil mein jaana har kisi se baat kar lena

gawara kar nahin sakta mere me'yar ka halqa

lahu qadmon se yun phuTa ki zanjiren lahak uTThin

munawwar ho gaya zindan-e-tang-o-tar ka halqa

gham-e-imroz ne paiman kiya hai ishq-e-farda se

kabhi to hoga shana-gir zulf-e-yar ka halqa

koi aasan na tha lekin bahut mushkil na tha 'tarzi'

meri zarb-e-nafas se khul gaya asrar ka halqa