khuli jo aankh to sadiyon ka fasla nikla

khulī jo aañkh to sadiyoñ kā fāsla niklā

mire vajūd meñ ik shaḳhs dūsrā niklā

ajab na thā mujhe sahrā kī dhuup khā jaatī

qadam baḌhā.e junūñ ne to rāsta niklā

ḳhabar nahīñ ki vo āshob-e-vaqt kaisā thā

har ek aañkh meñ barsoñ kā ratjagā niklā

firāq-e-sub.h meñ vo aañkh jal rahī thī magar

bujhā huā dar-e-hijrāñ pe ik diyā niklā

ġhazab kī aag dahakne lagī hai sīnoñ meñ

ye kaun dhuup meñ le kar ke aa.ina niklā

har ek phuul ne jhuk kar tujhe salāmī dī

jo sehn-e-gul meñ kabhī terā tazkira niklā

palak jhapakte hī duniyā badal ga.ī 'sāġhar'

ki merā saaya bhī mujh se gurez-pā niklā

khuli jo aankh to sadiyon ka fasla nikla

mere wajud mein ek shaKHs dusra nikla

ajab na tha mujhe sahra ki dhup kha jati

qadam baDhae junun ne to rasta nikla

KHabar nahin ki wo aashob-e-waqt kaisa tha

har ek aankh mein barson ka ratjaga nikla

firaq-e-subh mein wo aankh jal rahi thi magar

bujha hua dar-e-hijran pe ek diya nikla

ghazab ki aag dahakne lagi hai sinon mein

ye kaun dhup mein le kar ke aaina nikla

har ek phul ne jhuk kar tujhe salami di

jo sehn-e-gul mein kabhi tera tazkira nikla

palak jhapakte hi duniya badal gai 'saghar'

ki mera saya bhi mujh se gurez-pa nikla