khulta nahin ki hum mein KHizan-dida kaun hai

khultā nahīñ ki ham meñ ḳhizāñ-dīda kaun hai

āsūdgī ke baab meñ ranjīda kaun hai

āmādgī ko vasl se mashrūt mat samajh

ye dekh is savāl pe sanjīda kaun hai

dekhūñ jo ā.īna to ġhunūda dikhā.ī duuñ

maiñ ḳhvāb meñ nahīñ to ye ḳhvābīda kaun hai

amboh-e-ahl-e-zaḳhm to kab kā guzar chukā

ab rahguzar pe ḳhaak meñ ġhaltīda kaun hai

ai karb-nā-rasā.ī kabhī ye to ġhaur kar

mere sivā yahāñ tirā girvīda kaun hai

har shaḳhs dūsre kī malāmat kā hai shikār

āḳhir yahāñ kisī kā pasandīda kaun hai

to azm-e-tark-e-ishq pe qaa.em to hai magar

tujh meñ ye chand roz se larzīda kaun hai

khulta nahin ki hum mein KHizan-dida kaun hai

aasudgi ke bab mein ranjida kaun hai

aamadgi ko wasl se mashrut mat samajh

ye dekh is sawal pe sanjida kaun hai

dekhun jo aaina to ghunuda dikhai dun

main KHwab mein nahin to ye KHwabida kaun hai

amboh-e-ahl-e-zaKHm to kab ka guzar chuka

ab rahguzar pe KHak mein ghaltida kaun hai

ai karb-na-rasai kabhi ye to ghaur kar

mere siwa yahan tera girwida kaun hai

har shaKHs dusre ki malamat ka hai shikar

aaKHir yahan kisi ka pasandida kaun hai

to azm-e-tark-e-ishq pe qaem to hai magar

tujh mein ye chand roz se larzida kaun hai