خلوص دے کے سزاوار نفرتوں کا ہوا

خلوص دے کے سزاوار نفرتوں کا ہوا

نہ پوچھ حشر جو پچھلی رفاقتوں کا ہوا

ہنسے تو پڑ گئیں چہرے پہ کچھ خراشیں اور

شکار خندۂ لب کن جراحتوں کا ہوا

کہو گے کیا جو تمہارا وہ حال پوچھے گا

کہ پارہ پارہ گریباں شکایتوں کا ہوا

وہ خون دل ہی سہی کچھ قلم سے ٹپکا تو

چلو نزول تو ہم پر بھی رحمتوں کا ہوا

حصار حرف و ہنر توڑ کر نکل جاؤں

کہاں پہنچ کے خیال اپنی وسعتوں کا ہوا

چلا تھا میں کہ نئی آگہی پہ کچھ لکھوں

تمام سلسلہ برہم عبارتوں کا ہوا

تو ایک لفظ ہے معنی پہ خود دلالت کر

رہا بکھر کے جو خوگر وضاحتوں کا ہوا

بڑا ہنر ہے سلیقے سے بات کہنا بھی

فضاؔ کے بعد ہی اتمام حجتوں کا ہوا