KHulus-e-dil se maine sar tumhaare dar pe rakkha tha

ḳhulūs-e-dil se maiñ ne sar tumhāre dar pe rakkhā thā

magar kis dil se tum ne paañv mere sar pe rakkhā thā

maiñ har haare hue kā saath detā thā isī Dar se

mirā sar maañg kar tum ne kisī ḳhanjar pe rakkhā thā

vufūr-e-shauq se dil rakh diyā thā pā-e-nāzuk par

mujhe hosh aaya to dekhā ki sar patthar pe rakkhā thā

mirī chhaprī meñ vo iḳhlās kā bhūkā chalā aaya

mahal āv-bhagat kā kyūñki āDambar pe rakkhā thā

bahāreñ apne aslī rang meñ thiiñ merī sohbat meñ

fareb-e-ḳhush-numā.ī duur ke manzar pe rakkhā thā

mujhe ḳhilqat kī ḳhilqat hadd-e-duniyā par uThā laa.ī

ki jaise bojh merā hī zamāne bhar pe rakkhā thā

KHulus-e-dil se main ne sar tumhaare dar pe rakkha tha

magar kis dil se tum ne panw mere sar pe rakkha tha

main har haare hue ka sath deta tha isi Dar se

mera sar mang kar tum ne kisi KHanjar pe rakkha tha

wufur-e-shauq se dil rakh diya tha pa-e-nazuk par

mujhe hosh aaya to dekha ki sar patthar pe rakkha tha

meri chhapri mein wo iKHlas ka bhuka chala aaya

mahal aaw-bhagat ka kyunki aaDambar pe rakkha tha

bahaaren apne asli rang mein thin meri sohbat mein

fareb-e-KHush-numai dur ke manzar pe rakkha tha

mujhe KHilqat ki KHilqat hadd-e-duniya par uTha lai

ki jaise bojh mera hi zamane bhar pe rakkha tha