KHulus-e-tamir ho jo shamil sitam ka jazba bura nahin hai

ḳhulūs-e-ta.amīr ho jo shāmil sitam kā jazba burā nahīñ hai

vafā kareñge vo kyā kisī se jinheñ shu.ūr-e-jafā nahīñ hai

tirī samajh meñ na aa sakegī kisī ke ashkoñ kī qadr-o-qīmat

abhī hai nā-āshnā-e-ġham tū abhī tirā dil dukhā nahīñ hai

vafā kī azmat se āshnā haiñ kaheñ to rūdād-e-ġham kaheñ kyā

tujhe nadāmat ho jis ko sun kar vo dāstān-e-vafā nahīñ hai

ḳhudā-na-karda tumhāre dil ko koī dukhā.e to kyā karoge

nigāheñ tum ne to aisī pherīñ ki jaise merā ḳhudā nahīñ hai

vo khoyā khoyā sā un kā aalam laboñ pe halkī sī muskurāhaT

adā ye un kī 'matīn' jaise sunā bhī hai aur sunā nahīñ hai

KHulus-e-tamir ho jo shamil sitam ka jazba bura nahin hai

wafa karenge wo kya kisi se jinhen shuur-e-jafa nahin hai

teri samajh mein na aa sakegi kisi ke ashkon ki qadr-o-qimat

abhi hai na-ashna-e-gham tu abhi tera dil dukha nahin hai

wafa ki azmat se aashna hain kahen to rudad-e-gham kahen kya

tujhe nadamat ho jis ko sun kar wo dastan-e-wafa nahin hai

KHuda-na-karda tumhaare dil ko koi dukhae to kya karoge

nigahen tum ne to aisi pherin ki jaise mera KHuda nahin hai

wo khoya khoya sa un ka aalam labon pe halki si muskurahaT

ada ye un ki 'matin' jaise suna bhi hai aur suna nahin hai