خلوص و مہر کے سانچے میں ڈھل کے دیکھیں تو

خلوص و مہر کے سانچے میں ڈھل کے دیکھیں تو

رہ حیات کو اپنی بدل کے دیکھیں تو

حسیں ہیں اور بھی اس کارزار ہستی میں

حصار ذات سے باہر نکل کے دیکھیں تو

فلک سے چاند اتر آئے گا زمیں پہ کبھی

شریر بچے کی صورت مچل کے دیکھیں تو

اجالے پھیلیں گے ہستی کے گوشے گوشے میں

مثال شمع اندھیرے میں جل کے دیکھیں تو

وہی ہے تاب و تواں عشق کا زمانے میں

کرشمے آج بھی حسن ازل کے دیکھیں تو

مشام جاں مہک اٹھیں گے اس کی خوشبو سے

وطن کی خاک کو چہرے پہ مل کے دیکھیں تو

محاذ جنگ پہ ڈھونڈا جسے وہ گھر پہ ملی

عجب ہیں فیصلے یہ بھی اجل کے دیکھیں تو

بہار آئی ہے کیسی چمن میں ہم نفسو

گھروں سے نکلیں گلستاں میں چل کے دیکھیں تو

کلس چمک اٹھے صدیقؔ دھوپ پھیل گئی

اٹھیں بھی خواب سے آنکھوں کو مل کے دیکھیں تو