KHulus-o-mehr ke sanche mein Dhal ke dekhen to

ḳhulūs-o-mehr ke sāñche meñ Dhal ke dekheñ to

rah-e-hayāt ko apnī badal ke dekheñ to

hasīñ haiñ aur bhī is kār-zār-e-hastī meñ

hisār-e-zāt se bāhar nikal ke dekheñ to

falak se chāñd utar aa.egā zamīñ pe kabhī

sharīr bachche kī sūrat machal ke dekheñ to

ujāle phaileñge hastī ke goshe goshe meñ

misāl-e-sham.a añdhere meñ jal ke dekheñ to

vahī hai tāb-o-tavāñ ishq kā zamāne meñ

karishme aaj bhī husn-e-azal ke dekheñ to

mashām-e-jāñ mahak uTTheñge us kī ḳhushbū se

vatan kī ḳhaak ko chehre pe mal ke dekheñ to

mahāz-e-jang pe DhūñDā jise vo ghar pe milī

ajab haiñ faisle ye bhī ajal ke dekheñ to

bahār aa.ī hai kaisī chaman meñ ham-nafaso

gharoñ se nikleñ gulistāñ meñ chal ke dekheñ to

kalas chamak uThe 'siddīq' dhuup phail ga.ī

uTheñ bhī ḳhvāb se āñkhoñ ko mal ke dekheñ to

KHulus-o-mehr ke sanche mein Dhal ke dekhen to

rah-e-hayat ko apni badal ke dekhen to

hasin hain aur bhi is kar-zar-e-hasti mein

hisar-e-zat se bahar nikal ke dekhen to

falak se chand utar aaega zamin pe kabhi

sharir bachche ki surat machal ke dekhen to

ujale phailenge hasti ke goshe goshe mein

misal-e-shama andhere mein jal ke dekhen to

wahi hai tab-o-tawan ishq ka zamane mein

karishme aaj bhi husn-e-azal ke dekhen to

masham-e-jaan mahak uTThenge us ki KHushbu se

watan ki KHak ko chehre pe mal ke dekhen to

mahaz-e-jang pe DhunDa jise wo ghar pe mili

ajab hain faisle ye bhi ajal ke dekhen to

bahaar aai hai kaisi chaman mein ham-nafaso

gharon se niklen gulistan mein chal ke dekhen to

kalas chamak uThe 'siddiq' dhup phail gai

uThen bhi KHwab se aankhon ko mal ke dekhen to