KHulus-o-pyar gar ahl-e-chaman ke darmiyan hota

ḳhulūs-o-pyār gar ahl-e-chaman ke darmiyāñ hotā

chaman meñ rahnā ham ko kis liye bār-e-garāñ hotā

chhupā rakhā ajal kī aañkh se is nā-tavānī ne

vagarna paikar-e-ḳhākī ye jannat-āshiyāñ hotā

fazīlat us ko sābit karnī thī insān kī varna

rasūl aate na duniyā meñ na sahrā gulsitāñ hotā

luTā kar daulat-e-hosh-o-ḳhirad ye mudda.ā paayā

hameñ ai kaash kuchh andāza-e-sūd-o-ziyāñ hotā

bisāt-e-āshiyāñ ai barq kyā do-chār tinke the

maza to jab thā terī zad meñ saarā gulsitāñ hotā

adālat meñ zarūrat hī na thī jhūTī gavāhī ko

agar jo ḳhanjar-e-qātil haqīqat kī zabāñ hotā

na karte nafratoñ kī tuḳhm-rezī ham agar 'faizī'

to ye hindostāñ apnā vahī jannat-nishāñ hotā

KHulus-o-pyar gar ahl-e-chaman ke darmiyan hota

chaman mein rahna hum ko kis liye bar-e-garan hota

chhupa rakha ajal ki aankh se is na-tawani ne

wagarna paikar-e-KHaki ye jannat-ashiyan hota

fazilat us ko sabit karni thi insan ki warna

rasul aate na duniya mein na sahra gulsitan hota

luTa kar daulat-e-hosh-o-KHirad ye muddaa paya

hamein ai kash kuchh andaza-e-sud-o-ziyan hota

bisat-e-ashiyan ai barq kya do-chaar tinke the

maza to jab tha teri zad mein sara gulsitan hota

adalat mein zarurat hi na thi jhuTi gawahi ko

agar jo KHanjar-e-qatil haqiqat ki zaban hota

na karte nafraton ki tuKHm-rezi hum agar 'faizi'

to ye hindostan apna wahi jannat-nishan hota