KHulus-o-pyar se kashkol dil ka bharna bhi

ḳhulūs-o-pyār se kashkol dil kā bharnā bhī

kisī ke ġham meñ ibādat hai aah karnā bhī

kalī kī aañkh bhar aa.ī ye soch kar shāyad

bas ek raat meñ khilnā bhī hai bikharnā bhī

na jaane kis liye ham log bhuul baiThe haiñ

ki pul-sirāt se ik roz hai guzarnā bhī

bas ek lamhe se hotā hai ik sadī kā janm

sadī kī maut hai lamhe kā qatl karnā bhī

simaTnā din kā abhī tak hai merī āñkhoñ meñ

ġhurūr shab kā nigāhoñ meñ hai bikharnā bhī

vo har maqām pe be-ḳhauf ho ke bolegā

vo jāntā hai har ik pal ḳhudā se Darnā bhī

jhulas ke rah ga.e jab sāya-dār peḌ 'shu.ūr'

to kyā ajab hai shagūfoñ kā rang utarnā bhī

KHulus-o-pyar se kashkol dil ka bharna bhi

kisi ke gham mein ibaadat hai aah karna bhi

kali ki aankh bhar aai ye soch kar shayad

bas ek raat mein khilna bhi hai bikharna bhi

na jaane kis liye hum log bhul baiThe hain

ki pul-siraat se ek roz hai guzarna bhi

bas ek lamhe se hota hai ek sadi ka janm

sadi ki maut hai lamhe ka qatl karna bhi

simaTna din ka abhi tak hai meri aankhon mein

ghurur shab ka nigahon mein hai bikharna bhi

wo har maqam pe be-KHauf ho ke bolega

wo jaanta hai har ek pal KHuda se Darna bhi

jhulas ke rah gae jab saya-dar peD 'shuur'

to kya ajab hai shagufon ka rang utarna bhi