خلوص پیار وفا اور بے رخی کا لباس

خلوص پیار وفا اور بے رخی کا لباس

بدلتا رہتا ہے یہ وقت آدمی کا لباس

چھپے ہیں سارے ستارے ہے تیرگی کا لباس

ملا نہ شب کو کبھی روز چاندنی کا لباس

بہت ہی قیمتی ہے پیرہن چراغوں کا

جلا کے خود کو ملا ان کو روشنی کا لباس

لباس غم بھی مسرت سے تو پہن لے بشر

تمام عمر کسے مل سکا خوشی کا لباس

بڑے قرینے سے سب غم ہوئے ہیں پوشیدہ

ملا ہے جب سے مرے دل کو شاعری کا لباس

اسی کو چین میسر یہاں ہے جس نے بھی

اتار پھینکا ہو احساس کمتری کا لباس

ہے آرزو کہ ہو اب مغفرت نصیب مجھے

پرانا ہو گیا ہے میری زندگی کا لباس