KHumar-e-qurb mein is baat ka KHayal na tha

ḳhumār-e-qurb meñ is baat kā ḳhayāl na thā

hamāre zehn meñ kuchh aur thā visāl na thā

tirī judā.ī meñ mahtāb dekhte ham kyā

hamārā mas.ala tū thā tirā jamāl na thā

phir ek din use sab log dekhne pahuñche

palaT ke aa.e to lab par koī savāl na thā

kamāl ye hai tire hijr meñ salāmat huuñ

tire firāq meñ marnā koī kamāl na thā

ġhamoñ ke vahm meñ guzrī hai zindagī saarī

malāl karte rahe go koī malāl na thā

jo terā haal hai is se to saaf lagtā hai

hamāre baad kisī ko tirā ḳhayāl na thā

KHumar-e-qurb mein is baat ka KHayal na tha

hamare zehn mein kuchh aur tha visal na tha

teri judai mein mahtab dekhte hum kya

hamara masala tu tha tera jamal na tha

phir ek din use sab log dekhne pahunche

palaT ke aae to lab par koi sawal na tha

kamal ye hai tere hijr mein salamat hun

tere firaq mein marna koi kamal na tha

ghamon ke wahm mein guzri hai zindagi sari

malal karte rahe go koi malal na tha

jo tera haal hai is se to saf lagta hai

hamare baad kisi ko tera KHayal na tha