KHumar-e-shab mein jo ek dusre pe girte hain

ḳhumār-e-shab meñ jo ik dūsre pe girte haiñ

vo log mai se ziyāda nashe pe girte haiñ

sameT legā vo apnī kushāda bāñhoñ meñ

jo gir rahe haiñ isī aasre pe girte haiñ

ye ishq hai ki havas in dinoñ to parvāne

diye kī lau ko baḌhā kar diye pe girte haiñ

guzārtā huuñ jo shab ishq-e-be-ma.āsh ke saath

to sub.h ashk mire nāshte pe girte haiñ

ilāj-e-ahl-e-sitam chāhiye abhī se 'zafar'

abhī to sañg zarā fāsle pe girte haiñ

KHumar-e-shab mein jo ek dusre pe girte hain

wo log mai se ziyaada nashe pe girte hain

sameT lega wo apni kushada banhon mein

jo gir rahe hain isi aasre pe girte hain

ye ishq hai ki hawas in dinon to parwane

diye ki lau ko baDha kar diye pe girte hain

guzarta hun jo shab ishq-e-be-maash ke sath

to subh ashk mere nashte pe girte hain

ilaj-e-ahl-e-sitam chahiye abhi se 'zafar'

abhi to sang zara fasle pe girte hain