KHumar-e-shab mein tera nam lab pe aaya kyun

ḳhumār-e-shab meñ tirā naam lab pe aayā kyuuñ

nashe meñ aur bhī the maiñ hī laḌkhaḌāyā kyuuñ

maiñ apne shahr kī har rahguzar se pūchhtā huuñ

paḌā huā hai yahīñ vahshatoñ kā saayā kyuuñ

koī to dard hai aisā jo khīñchtā hai use

mire hī dil kī taraf lauT kar vo aayā kyuuñ

kisī nigāh kā maiñ husn-e-intiḳhāb na thā

to zindagī ne mujhe hī phir āzmāyā kyuuñ

kisī diye se gilā bhī kareñ to kaise kareñ

parā.e ghar kī muñDeroñ pe jagmagāyā kyuuñ

mujhe sambhāl ke rakhnā thā ai nigār-e-vatan

galī galī meñ lahū kī tarah bahāyā kyuuñ

maiñ gir paḌā thā kahīñ bebasī ke aalam meñ

mujhe uThā ke kisī ne gale lagāyā kyuuñ

KHumar-e-shab mein tera nam lab pe aaya kyun

nashe mein aur bhi the main hi laDkhaDaya kyun

main apne shahr ki har rahguzar se puchhta hun

paDa hua hai yahin wahshaton ka saya kyun

koi to dard hai aisa jo khinchta hai use

mere hi dil ki taraf lauT kar wo aaya kyun

kisi nigah ka main husn-e-intiKHab na tha

to zindagi ne mujhe hi phir aazmaya kyun

kisi diye se gila bhi karen to kaise karen

parae ghar ki munDeron pe jagmagaya kyun

mujhe sambhaal ke rakhna tha ai nigar-e-watan

gali gali mein lahu ki tarah bahaya kyun

main gir paDa tha kahin bebasi ke aalam mein

mujhe uTha ke kisi ne gale lagaya kyun