KHumar mein kabhi girte kabhi sanbhalte hue

ḳhumār meñ kabhī girte kabhī sañbhalte hue

vo ḳhvāb-gāh se nikle haiñ aañkh malte hue

nisār karne lage apnī jaan parvāne

na jaane sham.a ne kyā kah diyā pighalte hue

palaT palaT ke maiñ dekhā kiyā usī jānib

ajiib haal thā is shahr se nikalte hue

ye māntā huuñ kī masrūf haiñ bahut lekin

kabhī idhar bhī nikal ā.īye Tahalte hue

ye lag rahā hai ki aane ko hai vo rashk-e-chaman

ġhazal-sarā haiñ havā.eñ bhī aaj chalte hue

misāl-e-abr vo kyā phuuT phuuT kar royā

tirā asiir tirī qaid se nikalte hue

ab e.atibār kisī kā kareñ to kaise kareñ

ki ham ne dekhe haiñ chehre ka.ī badalte hue

asar duāoñ meñ hotā hai kis qadar ma.arūf

balā.eñ dekhī haiñ ham ne saroñ se Talte hue

KHumar mein kabhi girte kabhi sanbhalte hue

wo KHwab-gah se nikle hain aankh malte hue

nisar karne lage apni jaan parwane

na jaane shama ne kya kah diya pighalte hue

palaT palaT ke main dekha kiya usi jaanib

ajib haal tha is shahr se nikalte hue

ye manta hun ki masruf hain bahut lekin

kabhi idhar bhi nikal aaiye Tahalte hue

ye lag raha hai ki aane ko hai wo rashk-e-chaman

ghazal-sara hain hawaen bhi aaj chalte hue

misal-e-abr wo kya phuT phuT kar roya

tera asir teri qaid se nikalte hue

ab eatibar kisi ka karen to kaise karen

ki hum ne dekhe hain chehre kai badalte hue

asar duaon mein hota hai kis qadar maruf

balaen dekhi hain hum ne saron se Talte hue