KHurshid jhankta hai rida-e-sahab se

ḳhurshīd jhāñktā hai ridā-e-sahāb se

yā nuur chhan rahā hai kisī ke naqāb se

bāhar jo aaj dekh liyā hai hijāb se

sūraj laraz rahā hai tumhāre shabāb se

nāseh Darā rahe the ḳhudā ke 'azāb se

ḳhud hī janāb baaz na aa.e sharāb se

lamhe guzar chuke haiñ jo phūloñ kī sej par

is daur-e-pur-ḳhatar meñ vo lagte haiñ ḳhvāb se

ḳhud ko to pahle dekhiye phir kahiye bevafā

bas itnī iltijā hai hamārī janāb se

har roz ik na ik na.ī zid hai zabān par

tang aa gayā huuñ maiñ dil-e-ḳhāna-ḳharāb se

ahl-e-vafā meñ merā vahī naam paḌ gayā

tum ne mujhe navāz diyā jis ḳhitāb se

kin manziloñ pe merā nishān-e-qadam nahīñ

pūchho mirā maqām mah-o-āftāb se

jo husn kā kahīñ bhī tahaffuz na kar sake

phir kaun sā hai fā.eda aisī naqāb se

saaya bhī jis hasīn kā DhūñDe na mil sakā

be-misl vo ḳhudā ke hue intiḳhāb se

sun kar hamāre she'r vo kuchh muskurā diye

'fārūq' aaj ham bhī rahe kāmyāb se

KHurshid jhankta hai rida-e-sahab se

ya nur chhan raha hai kisi ke naqab se

bahar jo aaj dekh liya hai hijab se

suraj laraz raha hai tumhaare shabab se

naseh Dara rahe the KHuda ke 'azab se

KHud hi janab baz na aae sharab se

lamhe guzar chuke hain jo phulon ki sej par

is daur-e-pur-KHatar mein wo lagte hain KHwab se

KHud ko to pahle dekhiye phir kahiye bewafa

bas itni iltija hai hamari janab se

har roz ek na ek nai zid hai zaban par

tang aa gaya hun main dil-e-KHana-KHarab se

ahl-e-wafa mein mera wahi nam paD gaya

tum ne mujhe nawaz diya jis KHitab se

kin manzilon pe mera nishan-e-qadam nahin

puchho mera maqam mah-o-aftab se

jo husn ka kahin bhi tahaffuz na kar sake

phir kaun sa hai faeda aisi naqab se

saya bhi jis hasin ka DhunDe na mil saka

be-misl wo KHuda ke hue intiKHab se

sun kar hamare she'r wo kuchh muskura diye

'faruq' aaj hum bhi rahe kaamyab se