KHush bahut tha ek lamha shadmani dekh kar

ḳhush bahut thā ek lamha shādmānī dekh kar

ġham huā mujh ko yuuñ ġham kī tarjumānī dekh kar

jo guzartī jā rahī hai naam us kā umr hai

zindagī hairān hai is kī ravānī dekh kar

haa.e is sayyād ne dīvār rañvā dī ajiib

uḌ rahe haiñ saare panchhī āsmānī dekh kar

jugnuoñ ne aaj dāvat par bulāyā chāñd ko

chāñd shab bhar TimTimāyā mezbānī dekh kar

āñkheñ merī thiiñ labālab gard kā pahra thā yaañ

vo ye samjhā dhokā hai sahrā meñ paanī dekh kar

kyā maza gar ishq meñ thoḌī bahut duurī na ho

us ne ḳhud se ye kahā merī nishānī dekh kar

ek to dil shā.irāna aur phir majrūh bhī

chain mujh ko aa.egā bas bāġhbānī dekh kar

muTThiyoñ meñ ḳhaak le kar aa ga.e haiñ sab ke sab

kar do mujh ko dafn merī be-makānī dekh kar

vo mohabbat ke ma.ānī bas batātā hī rahā

ishq phir jaatā rahā dasht-e-ma.ānī dekh kar

raaz thoḌe aao kholeñ us ḳhudā ke muntazir

is zamīñ par āsmāñ kī hukmarānī dekh kar

KHush bahut tha ek lamha shadmani dekh kar

gham hua mujh ko yun gham ki tarjumani dekh kar

jo guzarti ja rahi hai nam us ka umr hai

zindagi hairan hai is ki rawani dekh kar

hae is sayyaad ne diwar ranwa di ajib

uD rahe hain sare panchhi aasmani dekh kar

jugnuon ne aaj dawat par bulaya chand ko

chand shab bhar TimTimaya mezbani dekh kar

aankhen meri thin labaalab gard ka pahra tha yan

wo ye samjha dhoka hai sahra mein pani dekh kar

kya maza gar ishq mein thoDi bahut duri na ho

us ne KHud se ye kaha meri nishani dekh kar

ek to dil shairana aur phir majruh bhi

chain mujh ko aaega bas baghbani dekh kar

muTThiyon mein KHak le kar aa gae hain sab ke sab

kar do mujh ko dafn meri be-makani dekh kar

wo mohabbat ke maani bas batata hi raha

ishq phir jata raha dasht-e-maani dekh kar

raaz thoDe aao kholen us KHuda ke muntazir

is zamin par aasman ki hukmarani dekh kar