خوش بیاں خوش رنگ خوش خو خوش نظر خوش دید ہے

خوش بیاں خوش رنگ خوش خو خوش نظر خوش دید ہے

خوبیوں کا آئنہ وہ مرکز امید ہے

گل بدن گل رو گل افشاں گل بداماں گل مہک

لالہ و گل سے عیاں اس حسن کی تائید ہے

ہم زباں ہم شغل ہم آہنگ ہم سن ہم نشیں

بے تکلف اس کی ہستی بے غم تنقید ہے

دل طلب دل آشنا دل کیش دل جو دل نواز

دل کی ہولی دل کی دیوالی ہے دل کی عید ہے

زندہ جادو زندہ فن زندہ غزل زندہ مثال

مصدر مہتاب ہے سر چشمۂ خورشید ہے

وہ حقیقت وہ صداقت وہ محبت وہ وفا

اس کا ہر افسانہ افسانے کی اک تمہید ہے