KHush kare ek pal tumhein ek pal rulae zindagi

ḳhush kare ik pal tumheñ ik pal rulā.e zindagī

lamha lamha aadmī ko āzmā.e zindagī

vaqt ke jis moḌ par jiine kī dil meñ chaah ho

bas usī hī moḌ par dāman chhuḌā.e zindagī

koī chāhe daulat-o-shohrat to koī chāhe pyaar

kaise kaise logoñ ko sapne dikhā.e zindagī

bachpanā umr-e-javānī ābrū-e-roz-o-shab

maiñ ne har shai tujh ko de dī māsivā-e-zindagī

daulat-o-shohrat ġhurūr-o-faḳhr aur jāh-o-hasham

ek din miT jaanī hai har ik anā-e-zindagī

baḌbaḌātā jā rahā hai rāste meñ ik faqīr

chand roTī ke liye dar dar phirā.e zindagī

chār-sū hai zulm shar aur maut kī tuġhyāniyāñ

koī batlā.e bhalā kis samt jaa.e zindagī

baad tere zindagī se ab kahāñ raġhbat mujhe

mere hamdam mat de mujh ko ab duā-e-zindagī

zindagī aise jiyo duniyā meñ ki marne ke baad

maut ro.e tum pe aur aañsū bahā.e zindagī

maut se ġhāfil haiñ jo vo yaad ye rakkheñ sadā

ek din chhin jā.egī tum se ridā-e-zindagī

dard tanhā.ī firāq-o-ranj-o-ġham hijr-o-alam

kis qadar ginvā.ūñ maiñ tum ko jafā-e-zindagī

kab bahār aa.egī gulshan meñ khileñge phuul kab

ai ḳhudāyā kab bharegī ye ḳhalā-e-zindagī

ilm-o-fikr-o-āgahī lahn-o-shu.ūr-o-shā.erī

ḳhuub maiñ ne paa.ī hai rab se jazā-e-zindagī

KHush kare ek pal tumhein ek pal rulae zindagi

lamha lamha aadmi ko aazmae zindagi

waqt ke jis moD par jine ki dil mein chah ho

bas usi hi moD par daman chhuDae zindagi

koi chahe daulat-o-shohrat to koi chahe pyar

kaise kaise logon ko sapne dikhae zindagi

bachpana umr-e-jawani aabru-e-roz-o-shab

main ne har shai tujh ko de di masiwa-e-zindagi

daulat-o-shohrat ghurur-o-faKHr aur jah-o-hasham

ek din miT jaani hai har ek ana-e-zindagi

baDbaData ja raha hai raste mein ek faqir

chand roTi ke liye dar dar phirae zindagi

chaar-su hai zulm shar aur maut ki tughyaniyan

koi batlae bhala kis samt jae zindagi

baad tere zindagi se ab kahan raghbat mujhe

mere hamdam mat de mujh ko ab dua-e-zindagi

zindagi aise jiyo duniya mein ki marne ke baad

maut roe tum pe aur aansu bahae zindagi

maut se ghafil hain jo wo yaad ye rakkhen sada

ek din chhin jaegi tum se rida-e-zindagi

dard tanhai firaq-o-ranj-o-gham hijr-o-alam

kis qadar ginwaun main tum ko jafa-e-zindagi

kab bahaar aaegi gulshan mein khilenge phul kab

ai KHudaya kab bharegi ye KHala-e-zindagi

ilm-o-fikr-o-agahi lahn-o-shuur-o-shaeri

KHub main ne pai hai rab se jaza-e-zindagi