KHush-KHirami ko teri ek chaman-zar to ho

ḳhush-ḳhirāmī ko tirī ek chaman-zār to ho

gul se bulbul ko jahāñ bāhamī takrār to ho

rang ke saath lahū bharne ko tayyār to ho

terī tasvīr bane kaise ki fankār to ho

jang aur ishq meñ har baat hai jaa.ez lekin

jiit us kī hai jo āmāda-e-paikār to ho

vo mohabbat hai mujhe bā.is-e-izzat jis meñ

kabhī inkār ho lekin kabhī iqrār to ho

āsmāñ vaqt ke ruḳhsār pe ho ashk fashāñ

taaj ke jaisā koī dūsrā shahkār to ho

chāñd aadhā hai magar raat se ye kahtā hai

raushnī ke liye mujh sā koī tayyār to ho

us kī tashrīh sadā hogī bahar-taur magar

harf ke paañv kī zanjīr meñ jhankār to ho

apne ash.ār sunā.ūñgā use maiñ lekin

shart itnī hai ki 'ġhālib' kā taraf-dār to ho

ham ki mahtāb se bhī aañkh churā leñge 'zafar'

lekin ik baar tirā vāda-e-dīdār to ho

KHush-KHirami ko teri ek chaman-zar to ho

gul se bulbul ko jahan bahami takrar to ho

rang ke sath lahu bharne ko tayyar to ho

teri taswir bane kaise ki fankar to ho

jang aur ishq mein har baat hai jaez lekin

jit us ki hai jo aamada-e-paikar to ho

wo mohabbat hai mujhe bais-e-izzat jis mein

kabhi inkar ho lekin kabhi iqrar to ho

aasman waqt ke ruKHsar pe ho ashk fashan

taj ke jaisa koi dusra shahkar to ho

chand aadha hai magar raat se ye kahta hai

raushni ke liye mujh sa koi tayyar to ho

us ki tashrih sada hogi bahar-taur magar

harf ke panw ki zanjir mein jhankar to ho

apne ashaar sunaunga use main lekin

shart itni hai ki 'ghaalib' ka taraf-dar to ho

hum ki mahtab se bhi aankh chura lenge 'zafar'

lekin ek bar tera wada-e-didar to ho