KHush nahin dard se jo ishq ka dawa na kare

ḳhush nahīñ dard se jo ishq kā da.avā na kare

hosh khone hoñ to jalvoñ kā taqāzā na kare

ātish-e-shauq nahīñ ātish-e-namrūd se kam

aag kā Dar ho to but-ḳhāne pe dhāvā na kare

ek āvāz se khul jaatā hai sab Dhol kā pol

daulat-e-ishq mayassar ho to ġhauġhā na kare

rind vo mo.atakif-e-ka.aba-e-hastī hai ki jo

zā.er-e-dair na ho azm-e-kalīsā na kare

husn vo husn hai jo ishq kī ramzeñ samjhe

ishq vo ishq hai jo husn ko rusvā na kare

ġham jise kahte haiñ vo ḳhūn-e-tamannā hī to hai

is se bachnā ho kisī ko to tamanna na kare

ham to kahte hī raheñge dil-e-murda se 'amīñ'

ḳhud agar jī na sake minnat-e-īsā na kare

KHush nahin dard se jo ishq ka dawa na kare

hosh khone hon to jalwon ka taqaza na kare

aatish-e-shauq nahin aatish-e-namrud se kam

aag ka Dar ho to but-KHane pe dhawa na kare

ek aawaz se khul jata hai sab Dhol ka pol

daulat-e-ishq mayassar ho to ghaugha na kare

rind wo moatakif-e-kaba-e-hasti hai ki jo

zaer-e-dair na ho azm-e-kalisa na kare

husn wo husn hai jo ishq ki ramzen samjhe

ishq wo ishq hai jo husn ko ruswa na kare

gham jise kahte hain wo KHun-e-tamanna hi to hai

is se bachna ho kisi ko to tamanna na kare

hum to kahte hi rahenge dil-e-murda se 'amin'

KHud agar ji na sake minnat-e-isa na kare