خوش نہیں درد سے جو عشق کا دعویٰ نہ کرے

خوش نہیں درد سے جو عشق کا دعویٰ نہ کرے

ہوش کھونے ہوں تو جلووں کا تقاضا نہ کرے

آتش شوق نہیں آتش نمرود سے کم

آگ کا ڈر ہو تو بت خانے پہ دھاوا نہ کرے

ایک آواز سے کھل جاتا ہے سب ڈھول کا پول

دولت عشق میسر ہو تو غوغا نہ کرے

رند وہ معتکف کعبۂ ہستی ہے کہ جو

زائر دیر نہ ہو عزم کلیسا نہ کرے

حسن وہ حسن ہے جو عشق کی رمزیں سمجھے

عشق وہ عشق ہے جو حسن کو رسوا نہ کرے

غم جسے کہتے ہیں وہ خون تمنا ہی تو ہے

اس سے بچنا ہو کسی کو تو تمنا نہ کرے

ہم تو کہتے ہی رہیں گے دل مردہ سے امیںؔ

خود اگر جی نہ سکے منت عیسیٰ نہ کرے