KHush-rang aasman uDa le gai hawa

ḳhush-rañg āsmān uḌā le ga.ī havā

ḳhushbū kā sā.ebān uḌā le ga.ī havā

kāñTe ulajh ke dāman-e-hastī se rah ga.e

phūloñ kī dāstān uḌā le ga.ī havā

āñkhoñ meñ ab chamakte dar-o-bām haiñ kahāñ

ḳhvāboñ kā vo makān uḌā le ga.ī havā

dil ke ta.alluqāt kī ḳhushbū kahīñ nahīñ

marbūt ḳhāndān uḌā le ga.ī havā

be-samt zindagī mirī be-samt hī rahī

manzil kā har nishān uḌā le ga.ī havā

thī jis ke dam se jalva-e-tahzīb-e-nau yahāñ

kab kā vo ḳhāk-dān uḌā le ga.ī havā

qismat se aa ga.e the ham ahl-e-sitam ke haath

vo tiir vo kamān uḌā le ga.ī havā

tūfāñ se kheltī huī kashtī guzar ga.ī

har chand bādbān uḌā le ga.ī havā

zāhir huā jo matl.a-e-dil par yaqīñ kā nuur

pal bhar meñ har gumān uḌā le ga.ī havā

badlā thā jin se 'nāz' mirā lahja-e-ġhazal

vo tarz vo bayān uḌā le ga.ī havā

KHush-rang aasman uDa le gai hawa

KHushbu ka saeban uDa le gai hawa

kanTe ulajh ke daman-e-hasti se rah gae

phulon ki dastan uDa le gai hawa

aankhon mein ab chamakte dar-o-baam hain kahan

KHwabon ka wo makan uDa le gai hawa

dil ke talluqat ki KHushbu kahin nahin

marbut KHandan uDa le gai hawa

be-samt zindagi meri be-samt hi rahi

manzil ka har nishan uDa le gai hawa

thi jis ke dam se jalwa-e-tahzib-e-nau yahan

kab ka wo KHak-dan uDa le gai hawa

qismat se aa gae the hum ahl-e-sitam ke hath

wo tir wo kaman uDa le gai hawa

tufan se khelti hui kashti guzar gai

har chand baadban uDa le gai hawa

zahir hua jo matla-e-dil par yaqin ka nur

pal bhar mein har guman uDa le gai hawa

badla tha jin se 'naz' mera lahja-e-ghazal

wo tarz wo bayan uDa le gai hawa